حزني بيديك ودمعتي بيديك

حزني بيديك ودمعتي برضه نواصيها بيديك
تقدر تضحكني وتبكيني وتلحق مشتهاك

الله عطاك وسلمك امري وامري محتويك
احفظ حقوقي والطف بحالي بعد مالله عطاك

العفو عند المقدره والعدل شيمة والديك
وانا ولد هادي معك واكبر مشاغب من وراك

هنا اتفرق منك وهناك اجتمع واذوب فيك
والخوف جايز من هنا والموت حتمي من هناك

واكبر دليل اني اذا فكرت يوم ازعل عليك
لقيت قلبي كل مايزعل يدور عن رضاك

وإذاك تذكر يوم كنا بين اجيك او ما اجيك
وشلون قلبي كسر الرهبه تحت صدري وجاك

ماجاك يهلك في نجاتك جاك ينجابك هليك
لان النجاة بما تنص اللايحه عندك هلاك

ياللي هلاكك مبتكر على نظام الهيدروليك
مهما يكن حجم الفزع يمنع وجود الارتباك

لبى الهلاك اللي كذا يوم انتهيبه وابتديك
والقى نظام الطيش يرسمني على فوضة صباك

وانا ولا ادري ليه اضمالك وانا اقدر ارتويك
تدري اقولك شي احلى شي يوم اروى ضماك

ابيك ياعمري وإذا ماتعجبك كلمة ابيك
خذها بلهجة ساكنين دبي ياعمري اباك

يكفيك لامن غبت مالك اسم غير اسم المليك
وإن جيت عقب غياب مالك اسم غير اسم الملاك

حشمة غلا ولاغلا حشمة وذيك تعز ذيك
غلاك يفضح حشمتك وبحشمتك يستر غلاك

ياقبلة الله كل ما اتخيل تقوس حاجبيك
لاطارت عيونك عجب واغضيت من زايد حياك

افقد وجود الجاذبية وارتفع لك هيك هيك
واطلع بعد اكثر واكثر لين تحضني سماك

والقى سماك تلفني من حول كوكب ناظريك
واسمع بمماليك‎‏ الكسل تفخر بطول الامتلاك

حالة تجرد وارتجاج وهلوسة تنسب اليك
اما اتحملها عنك ولا اتحملها معاك

مع ان مالي ذنب بس اقول يرضالي عيك
الله يسعدلي صباحك قبل يسعدلي مساك

شفت ان ربي سلمك امري ولا لك اي شريك
الا انت وعيونك وخدينك وتذويبة شفاك

امر من الله والله المعطي وكل شي في يديك
احفظ حقوقي والطف بحالي بعد مالله عطاك

مطلق النومسي